وبلىس اكىمدىگىنىڭ جانىنداعى جاستار ءىسى جونىندەگى كوشپەلى كەڭەستىڭ ۇزىنكول اۋدانىندا وتىرىسى ءوتتى. اۋداندىق, قالالىق جاستار ءىسى جانە مادەنيەت بولىمدەرىنىڭ باسشىلارى, جاستار رەزەرۆى ورتالىقتارىنىڭ جەتەكشىلەرى قاتىسقان كوشپەلى كەڭەس وتىرىسىندا «قازىرگى قازاقستاندىق جاستار قۇندىلىقتارىنىڭ ورنىعۋى جانە قوعامدىق سانانى جاڭعىرتۋ باعدارلاماسى شەڭبەرىندە ولاردىڭ قالىپتاسۋىنىڭ ءتۇيىندى اسپەكتىلەرى» جانە «جاستاردىڭ مادەني بوس ۋاقىتىن وتكىزۋ قىزمەتتەرىن ۇيىمداستىرۋ تۋرالى» ماسەلەلەر توڭىرەگىندە كەلەلى اڭگىمە ءوربىدى.وتىرىسقا وبلىس اكىمىنىڭ ورىنباسارى مارات جۇندىباەۆ قاتىستى. جاستار ءىسى ساياساتى باسقارماسىنىڭ باسشىسى كەنەش ءالىمجانوۆ وبلىس وڭىرىندە جۇزەگە اسقان ىستەر تۋرالى ايتىپ بەردى.
جاستار ساياساتىندا وبلىستا جۇمىس جۇرمەي جاتقان جوق. بىراق مارات جۇندىباەۆ جاستار اراسىندا بەلسەندىلىكتىڭ, كوشباسشىلىقتىڭ تومەندەپ كەتكەنىن ايتتى. ءار اۋىلدا, ءار اۋداندا جاستار سوڭىنان ەرەتىن كوشباسشىلار بولۋى ءتيىس.
«جاستار ىسىنە بيۋدجەتتەن از قارجى بولىنبەيدى. ءتۇرلى شارالار وتەدى, بىراق ولاردا ايتىلعان ماسەلەلەر تومەننەن كوتەرىلمەيدى, ايتەۋىر وتكىزۋ كەەرك بولعان سوڭ ءوتىپ جاتادى. كوزدەرى جانىپ, باستاما كوتەرەتىن جاستار از. كوشباسشىلىققا لايىق جاڭا ەسىمدەردى ىزدەمەيمىز, وسىدان بىرنەشە جىلدار بۇرىنعى ەسىمدەر جىل دا قايتالانىپ اتالىپ وتىرادى. جاڭا كوشباسشى جاستاردى تاربيەلەپ, ولاردى حالىقارالىق, رەسپۋبليكالىق فورۋمدارعا جىبەرىپ, وزگە ەلدەر تاجىريبەسىن ۇيرەتىپ, پىسىتۋ, تاربيەلەۋ كەمشىن» دەدى مارات قونىسباي ۇلى.
جاستار ساياساتى ىسىندە وسكەن, بۇگىندە وبلىستىق ءماسليحات دەپۋتاتى گۇلميرا قاپەنوۆا بۇرىنعى «جاستار بەلسەندىلەرىنىڭ مەكتەبىن» قايتادان قالپىنا كەلتىرۋدى ۇسىندى.
«قازىر ەكونوميكالىق-الەۋمەتتتىك سالادا كادرلار, ماماندار قانشالىقتى جەتپەسە, جاستار ساياساتىندا دا تاپ سونداي بەلسەندى كادرلارعا دەگەن كەدەيشىلىك بىلىنەدى. بۇرىن وبلىستا «جاستار بەلسەندىلەرىنىڭ مەكتەبى» بولاتىن, ءتۇرلى شارالار وتكىزىپ, ولاردى باۋلىپ شىعاراتىن. بۇگىندە رەسپۋبليكاداعى مينيسترلىكتەردە, مەملەكەتتىك قىزمەتتە, باسقا دا سالالاردا قوستانايلىق كادرلار از ەمەس. سولاردىڭ بارلىعى دا جاس بولعان, الگى مەكتەپتىڭ تاربيەسىن كورگەن. قازىر كابينەتتە وتىرىپ, جاستاردى تاربيەلەۋ قاتە باعىت. جاستار جۇرگەن جەردە ءتۇرلى باستامالار كوتەرىلىپ, جوبالار جاسالىپ, قىزىقتى ىستەر قايناپ جاتۋى ءتيىس» دەدى گۇلميرا قاپەنوۆا.
جاستار ءىسى كەڭەسىنىڭ كوشپەلى وتىرىسىنا قاتىسۋشىلار ءۇش سەكتسياعا ءبولىنىپ, وزەكتى ماسەلەلەردى تالقىلادى.
ءنازيرا جارىمبەت,
«ەگەمەن قازاقستان»
قوستاناي